Quand a m’suvên

di Savino Rabotti

Un cêrs ad ragasö, là, in mèš a l’âra
ch’i’ s’ mövne cme föjtîni d’ margherìta;
in mèš a tú-c a gh’é ‘na pîna drìta,
ch’ la pârla, ma un pô pêrsa, un pô indecîša.
La gh’ha i cavî biundîn, carnagiûn ciâra,
i’ ò-c celèst, ‘na vestîna d’ föji d’ röša.

”Lungo la strada
che porta alla contrada
passan tre fanti
su tre cavalli bianchi…”

E me, ch’i’ êra un frušìi âlt una spàna,
cun ‘l brâghi cûrti e i sòcle arampinâ,
i’ m’ fermêva a pensâr: “Sperèm ch’ la m’ ciàma!”,
e sentèndem tucâr da cla manîna
a m’ parîva d’ sentêr cùma ‘na fiàma
ch’ la m’ lasêva de stúch, tút incantâ.

« … e tu, gentil messere,
sarai mio cavaliere » !

… e via, in gròpa a ûn d’ chi cavàj biânch,
per purtâla luntân, luntân, luntân…
Lê la m’ brasêva cun túti dû ‘l mân,
cuciâda, strìca strìca, lì, al mi’ fiânch…
e i’ vulêvne vers un mund dai castê d’ôr,
cun múšica e giardîn stracûlme d’ fiûr.

QUANDO RICORDO… Un cerchio di bambini in mezzo all’aia che si muovono come petali di margherita. In mezzo a tutti c’è una bimba, dritta, che pronuncia qualcosa, ma un poco smarrita, un poco indecisa. Ha i capelli biondi, il visino chiaro, gli occhi azzurri e un vestitino fatto di petali di rosa. [Rit.] E io che ero un bagaglino alto una spanna, coi pantaloni corti e gli zoccoli rinsecchiti, mi fermavo a pensare: “…speriamo che chiami me!”, poi, sentendomi toccare da quella manina, mi pareva di sentire come una fiamma che mi lasciava di stucco, incantato. [Rit.] … e via, in groppa ad uno di quei cavalli bianchi per portarla lontano, lontano, lontano, … lei mi abbracciava con tutte e due le mani, accucciata, stretta stretta, ai miei fianchi, … e volavamo verso un mondo con castelli d’oro, con musica e giardini stracolmi di fiori.